Manifestadeg Gwengamp 29/05

manif guingamp - pour que vivent nos langues

D’an 29 a viz Mae e tegouezho ar Redadeg e Gwengamp. Ur gouel eo sañset bezañ an darvoud-mañ. Met un doare da stourm evit ar brezhoneg eo ar Redadeg ivez. Neuze e pedomp an holl da vont da zibuniñ evit difenn hor yezh d’an devezh-se da 1e30 e ti-gar Gwengamp.

Al lezenn gouestlet d’ar yezhoù bro bet savet gant Paul Molac zo bet votet gant holl gannaded Breizh ha degemeret mat gant kalz dilennidi lec’hel. Diskouez a ra ez eo gouest ar vretoned d’en em glevet kenetreze evit difenn ar brezhoneg.

Gant al lezenn nevez, ma n’eo ket drailhet gant Kuzul ar Vonreizh, e vo tu kreñvaat plas ar brezhoneg war ar panellerezh, er stad sivil ha dreist-holl arc’hantaouiñ en ur mod reishoc’h ar skolioù Diwan ha lakaat e pleustr ar c’helenn dre soubidigezh er skolioù publik ha prevez.

Evit lakaat ur yezh da vevañ ha da vezañ implijet e tleer diorren ur politikerezh yezh, gant ar budjed a zere, gant pep strollegezh e pep lec’h e Breizh a-bezh war kement tachenn :

e bed ar vugaligoù, en deskadurezh, deus ar skol-vamm betek ar skol-veur,
er mediaoù hag en embann, er c’hleweled hag er bed niverel,
er stummadur evit an dud deuet,
en dudi evit ar re vihan koulz hag an dud deuet,
en oberennoù arzel amatour hag a-vicher,
en ekonomiezh hag er servij publik.

Kement-se a vo termenet gant ar palioù a vo enskrivet en Emglev Stad/Rannvro diwar-benn hor yezh, he implij er vuhez foran, hag en treuzkas barregezhioù da Vreizh.

Evit ma vo lakaet palioù uhel en emglev Stad-Rannvro, evit nac’hañ an tagadennoù dizonest a-berzh ar gouarnamant kreiz e pedomp ac’hanoc’h da zibuniñ e Gwengamp d’an 29 a viz Mae evit degouezh ar Redadeg.

Un nebeud deizioù a-raok an dilennadegoù Rannvro ha Departamant e tibunimp a-stroll da ziskouez hor c’hoant da welet hor yezh vev o vont war-raok gant ur statud ofisiel.

ROUEDAD AR BREZHONEG

Le réseau de la langue bretonne

Galv sinet gant ar c’hevredigezhioù : Stumdi, Mervent, Sked, KLT, DAO, Emglev Bro Gwened, Arvorig FM, Bannoù Heol, Ar Redadeg, KBP-APLB, Emglev Bro An Oriant, Ti Douar Alre, KEAV, Ti ar Vro Landerne-Daoulaz, Mignoned ar brezhoneg, Daoulagad Breizh, Ti ar Vro Gwengamp, Telenn – Ti ar Vro Sant-Brieg, Ai’ta!, C’hoariva, Keit Vimp Bev, Roudour, Skol an Emsav…