Ar skipailh

Deuit e darempred ganeomp evit prenañ al levr (5€).

Testenn tennet eus levr 30 vloaz Stumdi, skrivet gant Claudie Malnoë, renerez :

Pa ‘z on erruet e Stumdi e-giz renerez e 2004, e oa ar greizenn-stummañ gant ur prantad start – e-giz ma c’hoarvez en ur bern kevredigezhioù hag a labour e brezhoneg. Memestra, ha pa vanke arc’hant er c’hef, e oa en ti-se ur gwir deñzor :  ur skipailh eus ar c’hentañ, mennet, barrek, ha kalonek a-walc’h evit kenderc’hel d’ober ul labour aketus hag efedus, daoust da drubuilhoù a bep seurt. Meur a wech e oa bet goulennet diganin petra e oa sekred Stumdi evit kreskiñ ken brav, o kinnig bepred ul labour ken efedus, o chom tost ouzh pep stajiad, hag o krouiñ stummadurioù nevez ingal, pe ur servij e-giz ar servij-heñchañ. Simpl eo ar respont : ar skipailh implijidi eo a ra berzh… Ne vez ket implijet ganeomp implijidi war gevratoù-labour berr, evit tapout sikourioù a bep seurt ; ar c’hontrol eo : ar pal eo derc’hel an holl ;  ne vez ket implijet ganeomp morse tud a youl vat evit ober lod eus hol labour : deomp-ni da gavout ar budjetoù evit derc’hel an holl c’hopridi nevez-implijet, ha tuta da vat, tamm ha tamm, hor vakatourien hag a  c’hellfe tapout ur gevrat didermen ma vefe roet peadra deomp… rak n’eo ket al labour a vank. Trugarez neuze d’ar skipailh a-bezh, met ivez d’ar c’huzul-merañ hag a oar termeniñ ur politikerezh hollek evit Stumdi, hag a oar ivez asantiñ e vefe emren ar skipailh evit kas e gefridioù da benn. Un afer a fiziañs hag a  zoujañs eo etre izili ar c’huzul-merañ, an implijidi hag ar stajidi.